متی دی انجیل
باب ۲۶
۱۱۔ تے اَیوں ہویا پئی جد یِسُوع اِہ سارِیاں گلّاں مُکائِیاں۔ اوس اپنے شاگِرداں نُوں آکھیا۔
۲۲۔ تُسِیں جاندے ہو ۔پئی دو (۲)دِناں دے پچّھوں فسح دی عِید ہووے گی تے اِبن آدم صلیب دتّے جاندے واسطے حوالہ کیتا جاندا ہے۔
۳۳۔ تد سردار کاہن تے قوم دے بزرگ کا ئفاناں سردار کاہن دے دیوان خانے وچ جمع ہوئے۔
۴۴۔ تے صلاح کیتی پئی یِسُوع نُوں فریب نال پھڑ کے مارسُٹّئے۔
۵۵۔ پر اُہناں آکھیا پئی عید دے دن نُوں نہیں۔ متے لوکاں وچ بلوا ہو جائے۔
۶۶۔ تے جد یِسُوع بیت عنیا وِچ شمعُون کوڑھے دے گھر وِچ سی۔
۷۷۔ اک جنانی اُہدے کول آئی جِہدے کول اِک بڑے مُل والے عِطر دی سنگ مرمر دی عِطر دانی سی۔ اوس اُہنُوں اُہدے سِر اُتّے جَد اُہ کھانا پیا کھاندا سی اُلٹا دِتّا۔
۸۸۔ پر شاگِرداِہ ویکھ کے بڑے کھج گئے۔ تے آکھن لگے۔ اِہ نقصان کاہنُوں ہویا؟
۹۹۔ اِہ عِطربڑے مل نُوں وک سکدا تے غریباں نُوں دِتّا جا سکدا سی۔
۱۰۱۰۔ پر یِسُوع نے اِہ جان کے اُہناں نُوں آکھیا ایس جنانی نُوں کیوں دُکھ دیندے ہوکیوں جو اوس میرے نال چنگا کم کیتا ہے۔
۱۱۱۱۔ غریب لوک تے سدا تُہاڈے نال نے۔ پر میں سدا تُہاڈے نال نہیں ہاں۔
۱۲۱۲۔ پئی اِہ جو اوس میرے بدن اُتّے عطرپایا سو کفنان دفنان لئی کِیتاہے۔
۱۳۱۳۔ میں تُہانُوں سچ آکھنا ہاں پئی سارے جہان وِچ جتّھے کِتے ایس خوشخبری دی منادی ہووے گی اوتھے اِہ بھی جو اوس کیتا ہے اُہدی یاد گیِری لئی آکھیا جائے گا۔
۱۴۱۴۔ تد اُہناں بارھاں(۱۲) وچوں اک نے جہدا ناں یہوداہ اسکریوتی سی سردار کاہناں کول جاکے آکھیا۔
۱۵۱۵۔ جے اُہنُوں میں تُہانُوں پھڑا دیاں تاں تُسِیں مینُوں کیہ دیو گے؟تے اُہناں اُہنُوں تریہہ(۳۰) روپے دِتّے۔
۱۶۱۶۔ تے اوسے ویلے تھوں اُہ داء لبھدا سی پئی اُہنُوں پھڑوا دیاں۔
۱۷۱۷۔ تے فطیری روٹیاں دی عِید دے پہلےدن شاگرداں نے یِسُوع کول آکے آکھیا۔ تُوں کِتّھے چاہنا ہیں پئی اسِیں تیرے کھان لئی فسح تیار کریئے ؟
۱۸۱۸۔ تد اوس آکھیا شہر وِچ فُلا نے جنے دے کول جاکے اُہنُوں آکھو پئی اُستاد آکھدا ہے۔ پئی میرا ویلا نیڑے آگیا ہے۔ میں تیرے گھر اپنے شاگِرداں نال فسح دی عید کرنی ہے۔
۱۹۱۹۔ تے جس طرح یِسُوع نے اُہناں نُوں حُکم دِتّا سی اُہناں کِیتا۔ تے فسح تیار کیتی۔
۲۰۲۰۔ تے شام ویلے اُہ اپنے بارھاں (۱۲)شاگرداں نال کھانا کھان بیٹھا ہویا سی۔
۲۱۲۱۔ تےجد اُہ پَئے کھاندے سان اوس آکھیا مَیں تُہانُوں سچ آکھنا ہاں پئی تُہاڈے وِچّوں اک مینُوں پھڑوائے گا۔
۲۲۲۲۔ تد اُہ بہت اُداس ہوئے تے ہر اک اہنُوں آکھن لگا خداوندا مَیں اُہ ہی ہاں ؟
۲۳۲۳۔ اوس جواب دتا۔ جس میرے نال تھالی وچ ہتھ پایا ہے۔ اُہ مینُوں پھڑوائے گا۔
۲۴۲۴۔ اِبن آدم تاں جاندا ہے جویں اُہدےحق وچ لکھیاہویا ہے۔ پر ہاے افسوس اوس آدمی اُتے جہدی راہیں اِبن آدم پھڑوایا جاندا ہے۔ اوس آدمی لئی بھلا ہندا جےاُہ نہ جمدا ۔
۲۵۲۵۔ تد یہودا جِہڑا اُہدا پھڑان والا سی بولیا اے اُستاد میں اُہ ہی ہاں ؟اوس اُہنُوں آکھیا تُوں آپ آکھ دِتّا۔
۲۶۲۶۔ تے جد اُہ پئے کھاندے سان تَد یِسُوع روٹی تے برکت دےکے اپنے شاگرداں نُوں آکھیا۔ لو کھاو اِہ میرا بدن ہے۔
۲۷۲۷۔ تے اوس پیالہ لے کےشکر کیتا تے اُہناں نُوں دے کے آکھیا تُسِیں سارے اِہدے وِچّوں پِیو۔
۲۸۲۸۔ کیوں جو عہد دا اِہ میرااُہ لہُو ہے۔ جہڑا بہتیاں دی خاطِر گُناہاں دی معافی لئی وگایا جاندا ہے۔
۲۹۲۹۔ تےمیں تُہانُوں آکھنا ہاں پئی ایدوں اگّے میں ایسں انگور دی رس نہ پِیا ں گا اوس دن تیکر جدوں تیکر اپنے باپ دی بادشاہی وچ میں اُہنُوں تہاڈے نال نویں سر نہ پیاں۔
۳۰۳۰۔ تےگیت گاؤں کے اُہ زیتُوناں دے پہاڑ نُوں نکل گئے۔
۳۱۳۱۔ تد یِسُوع اُہناں نُوں آکھیا اَج رات تُسِیں میری بابت ٹھوکر کھاو گے کیوں جو اِہ لِکھّیا ہے۔ ’’پئی میں آجڑی نُوں ماراں گا تے اِجّڑدِیاں بھیڈاں کِھلّر جان گیاں۔
۳۲۳۲۔ پر میں اپنے جی اُٹّھن دے مگروں تُہاتھوں اگّے گلیل نُوں جاں گا۔
۳۳۳۳۔ تد پطرس اُہنُوں جواب دِتّا۔ بھانویں سارے تیری بابت ٹھوکر کھان پَرمَیں ٹھوکر کدی نہ کھاں گا۔
۳۴۳۴۔ یِسُوع اُہنُوں آکھیا میں تینُوں سچ آکھناں ہاں پئی تُوں اَج رات کُکڑدی بانگ دین تھوں پہلاں تن(۳) واری میرا انکار کریں گا۔
۳۵۳۵۔ پطرس نے اُہنو ں آکھیا بھانویں تیرےنال مینُوں مرنا بھی پوے تاں بھی میں تیرا اِنکار کدی نہ کراں گا۔ تے سارے شاگرد ایسے طرح آکھن لگے۔
۳۶۳۶۔ تد یِسُوع اُہناں دے نال گتسمنی ناں اک جگہ وچ آیا تے اپنے شاگرداں نُوں آکھیا تُسِیں ایتھے بہو جناں چر میں اوتھے جاکے دُعا منگاں۔
۳۷۳۷۔ تےپطرس تےزبدی دے دوہاں پُتّراں نُوں نال لیکے اُہ دُکھی تےبہت غمگین ہون لگا۔
۳۸۳۸۔ تد اُہ اُہناں نُوں آکھن لگا میرا جی بہت دُکھی ہے مرن دے درجہ تِیکر۔ تُسِیں ایتھے ٹھیرو تے میرے نال جاگدے رہو۔
۳۹۳۹۔ تے تھوڑا اگّے ودھکے منہ پرنےڈگ پِیا۔ تے دُعا منگدیاں ہویاں اِہ آکھیا اے میرے باپ جے کر ہو سکےتاں اہ پیالہ میتھوں ٹل جائے۔ تاں بھی نہ جس طرح میں چاہناں ہاں پرجس طرح تُوں چاہناہیں۔
۴۰۴۰۔ پھیراُہ شاگرداں کول آیا تے اُہناں نُوں ستیاں ہویاں ویکھکے پطرس نُوں آکھیا۔ تُسِیں اِک گھڑی وی میرے نال نہ جاگ سکے؟
۴۱۴۱۔ جاگو تے دُعا منگو تاں جو تُسِیں آزمائش وچ نہ پوو۔ روح تے تیار ہے پر بدن کمزور ہے۔
۴۲۴۲۔ پھیر اوس دوجی وار جاکے دُعا منگی تے آکھیا اےمیرےباپ جیکر اِہ میرے پیتیاں بناں میتھوں نہیں ٹل سکدا تاں تیری مرضی ہووے۔
۴۳۴۳۔ تے اوس پھیرآکے اُہناں نُوں ستیاں ہوئیاں ڈٹھا کیوں جو اُہناں دیاں اَکھّیاں بھاریاں ہوئیاں ہوئیاں سان۔
۴۴۴۴۔ تے اُہناں نُوں پھیر چھڈکے اُہ ٹُرگیا۔ تےتریجی(۳) واری مڑاُہوئی گل آکھکے دُعا منگی۔
۴۵۴۵۔ تد شاگرداں کول آیا تے اہناں نُوں آکھیا۔ ہُن سُتّے رہو تے آرام کرو۔ ویکھو ویلا آگیا ہے تے ابن آدم گُنہگاراں دے ہتھ پھڑوایا جاندا ہے۔
۴۶۴۶۔ اُٹھو چلئے ویکھو میرا پھڑان والا نیڑے آگیا ہے۔
۴۷۴۷۔ تے اُہ اجے پیا آکھدا ہی سی تے ویکھو یہودا (جہڑا اُہناں بارہاں(۱۲) وِچّوں اک سی )آگیا تے سردار کاہناں تے لوکا ں دے بُزرگا ں دے وَلوں اک وڈی بھیڑ تلواراں تےڈانگاں لیکے اُہدے نال آپہنچی۔
۴۸۴۸۔ تے اُہدے پھڑان والے نے اُہناں نُوں اِہ آکھ کے پتا دِتّا سی پئی جِہنُوں میں چُمّاں گا اُہو ہی ہے اُہنُوں پھڑلینا۔
۴۹۴۹۔ تے سِدّھیاں یِسُوع کول آکے اوس آکھیا ’’اے ربّی سلام‘‘ تے اُہنُوں چُمیاں۔
۵۰۵۰۔ تے یِسُوع نے اُہنُوں آکھیا بھائی جس کم واسطے تُوں آیا ہیں کر لے۔ تد اُہناں نیڑے آکے یِسُوع نُوں پھڑلیا۔
۵۱۵۱۔ تے ویکھو یِسُوع دے ساتِھیاں وِچّوں اک نے ہتھ ودھا کے اپنی تلوارکھچی تے سردار کاہن دے غُلام نُوں مار کے اُہدا کن اُڈا دِتّا۔
۵۲۵۲۔ تد یِسُوع اُہنُوں آکھیا اپنی تلوار میان کر کیوں جو جِہڑے تلوار کھِچدے نے تلوار نال مارے جان گے۔
۵۳۵۳۔ تُوں اِہ سمجھنا ہیں پئی میں اپنے باپ دی مِنّت نہیں کر سکدا تے اُہ بارہاں(۱۲) نالوں بھی وَدھ فرشتیاں دیاں فوجاں میرے کول ہنے حاضر نہ کرئے گا ؟
۵۴۵۴۔ پھیر اُہ نوشتے پئی ایسے طرح ہونا ضرور ہے ؟ کیکر پورے ہندے؟
۵۵۵۵۔ اوسے ویلے یِسُوع لوکا ں نُوں آکھیا تُسِیں مینُوں چور سمجھ کے تلواراں تے ڈانگاں لیکے پھڑن لئی باہر نکلے ہو؟ میں روز ہیکل وچ بہکے تعلیم دیندا ساں تے تُساں مینُوں نہ پھڑیا۔
۵۶۵۶۔ پر اِہ سب کجھ ایس لئی ہویا پئی نبیاں دے نوشتے پُورے ہون۔ تد سارے شاگرداُہنُوں چھڈ کے بھج گئے۔
۵۷۵۷۔ تے یِسُوع نُوں پھڑن والے اُہنُوں قائفا ناں سردار کاہن کول لے گئے۔ جتھے فقیہ تے بُزرگ اکٹھے ہوئے ہوئے سان۔
۵۸۵۸۔ تے پطرس دُور دُور اُہدے مگر مگر سردار کاہن دے دیو ان خانے تِیکر گیا تے اندر جا کے پِیادیاں نال بہہ گیا پئی اخِیر نُوں ویکھے۔
۵۹۵۹۔ تے سردار کاہن تے سار ی پنچایت یِسُوع دے بر خلاف جھوٹی گواہی لبھدے سان پئی اُہنُوں جانُوں مارن۔
۶۰۶۰۔ پر نہ لبّھی بھانویں جھوٹے گواہ بہتیرے آئے۔ پر اوڑک نُوں دو (۲)جنیاں اگے ہو کے آکھیا۔
۶۱۶۱۔ پئی اوس آکھیا ہے پئی میں خدا دی ہیکل نُوں ڈھا سکنا ہاں تے تناں (۳)دناں وچ بنا بھی سکنا ہاں۔
۶۲۶۲۔ تے سردار کاہن اُٹھ کھلو کے اُہنُوں آکھیا۔ تُوں جواب نہیں دیندا ؟اِہ تیرے اُتے کِیہ کُجھ بھگتاندے نے ؟
۶۳۶۳۔ پر یِسُوع چپ ہی کر رہیا۔ تے سردار کاہن اُہنُوں آکھیا میں تینُوں زندہ خدا دی سونہہ دیناں ہاں۔ پئی جے تُوں مسیح خدا دا بیٹا ہیں تاں سانُوں دس۔
۶۴۶۴۔ یِسُوع اُہنُوں آکھیا تُوں آپے آکھ دِتّا ہے پھیر بھی میں تُہانُوں آکھنا ہاں پئی ایدوں اگّے تُسِیں اِبن آدم نُوں قدرت دے سجے ہتھ بیٹھیاں ہوئیاں تے اَسمان دے بدلاں اتے آوندیاں ویکھو گے۔
۶۵۶۵۔ تد سردار کاہن اپنے کپڑے پاڑ کے آکھیا ایس کُفر آکھیا ہے۔ ہُن سانُوں گواہاندی کِیہ لوڑہے ؟لَوہُن تُساں بھی کُفر سُن لیا ہے۔
۶۶۶۶۔ تُہانُوں کیہ سمجھدا ہے۔ اُہناں جواب دے کے آکھیا اُہ موت دے لائق ہے۔
۶۷۶۷۔ تد اُہناں اُہدے مُنہ اُتّے تُھکیا تے اُہنُوں مکّے مارے تے ہورناں نے دھپّے مار کے آکھیا۔
۶۸۶۸۔ مسیحا سانُوں نبوت نال دس تینُوں کس ماریا ؟
۶۹۶۹۔ تے پطرس باہر دیوان خانے وچ بیٹھا ہویا سی تے اک چھوکری اُہدے کول آکے آکھیا تُوں بھی گلیل دے یِسُوع نال سَیں۔
۷۰۷۰۔ اوس سبھناں دے سامنے مُکّر کے آکھیا میں نہیں جاندا پئی تُوں کیہ آکھنی ہیں۔
۷۱۷۱۔ تے جداُہ باہر ڈیوڑھی وِچ گیا تاں دُوجی اُہنُوں ڈِٹّھا۔ تے اُہ اُہناں نُوں جِہڑے اوتھے سان آکھن لگی اُہ بھی یِسُوع ناصِری دے نال سی۔
۷۲۷۲۔ تد اُہ سونہہ کھاکے پھیر مُکر پیا پئی میں اوس آدمی نُوں نہیں جاندا۔
۷۳۷۳۔ تے تھوڑے چر پِچھّوں اُہناں نے جِہڑے اوتھے کھلوتے سان پطرس دے کول جاکے آکھیا ٹھیک تُوں بھی اہناں وچوں ہیں۔ تیری بولی پئی دسدی ہے۔
۷۴۷۴۔ تد اُہ لعنتاں پان تے سونہہ کھان لگ پیا۔ پئی میں اوس شخص نُوں نہیں جاندا تے اُونویں کُکڑ نے بانگ دتّی۔
۷۵۷۵۔ تدوں پطرس نُوں یِسُوع دی اُہ گل جِہڑی اوس اُہنُوں آکھی سی یاد آئی۔ پئی کُکڑ دے بانگ دین تھوں پہلاں تُوں میرا تن(۳) واری اِنکار کریں گا۔ تےاُہ باہر جا کے ڈھائیں مار مار کے رویا۔